बुटवल । नेपाल कम्युनिस्ट पार्टी रुपन्देही ३ नम्बर कमाण्डले भुटानी शरणार्थी प्रकरणका दोषिलाई कार्वाहीका लागि खबरदारी कार्यक्रम देवदहको खैरेनि बजारमा सम्पन्न गरेको छ ।
खबरदारी कार्यक्रमलाई सम्बोधन गर्दै नेकपाका जिल्ला नेता तथा ३ नम्बर कमाण्ड इन्चार्ज बिज्ञान सीले संसदवादी दलभित्रका दलालहरुले मानव तस्करहरुले नेपाली नागरिकलाई बिदेशमा बेचिरहेका छन् यी दलालहरुका विरुद्ध नेपाली जनता एकजुट भएर लाग्नुको विकल्प नरहेको बताए ।
उनले कम्युनिस्ट आन्दोलनबाट आएका नेताहरुले जनताका हकहितका लागि लड्न छोडेर मानव तस्करमा लागिरहेको र यो कार्य निकै निन्दनीय भएको बताए ।
खबरदारी कार्यक्रममा नेकपाका जिल्ला नेता तथा थारु राष्ट्रिय मुक्तिमोर्चा नेपालका जिल्ला अध्यक्ष जसवन्त सीले नेपाली नागरिकलाई नक्कली भुटानी शरणार्थी बनाएर तस्करी गर्ने दलाल तस्करहरुलाई कडा कार्वाही गर्नुपर्ने बताए ।
कार्यक्रममा नेकपाका जिल्ला नेता शिशिर सी ,राजु सी, विष्णु सी लगायतको उपस्थिती रहेको थियो । कार्यक्रमको सञ्चालन देवदह नगर इन्चार्ज मुक्ति सीले गरेका थिए ।
