गुल्मी । सत्यवती गाउँपालिका ठूलो लुम्पेकमा ‘ल्हुम्पेक कला तथा साहित्य यात्रा’ अन्तर्गत शनिबार ‘ठूलो लुम्पेकमा अध्ययन संस्कृति’ र ‘गाउँ र सामाजिक सञ्जाल’ बिषयक विमर्श सम्पन्न भएको छ ।
कार्यक्रममा अध्ययन संस्कृतिबारे अवधारणा प्रस्तुत श्री धर्मपुर माध्यमिक विद्यालयका प्रधानाध्यापक बलबहादुर राहादी मगर र शिक्षक कृष्ण पुलामीले गर्नुभएको थियो भने गाउँ र सामाजिक सञ्जाल बिषयक अवधारणा पत्र प्रस्तुत शिक्षक एवं साहित्यकार प्रदीप राहादी मगरले गर्नुभएको थियो ।
अवधारणा पत्रमा ठूलो लुम्पेकमा अध्ययन संस्कृतिको परम्परा, वर्तमान अवस्था र आगामी योजनाबारे प्रस्तुत गरिएको थियो भने गाउँमा सामाजिक सञ्जालको प्रयोगको अवस्था, यसका सकरात्मक र नकरात्मक प्रभाव र यसलाई प्रयोग गर्दा ध्यानदिनुपर्ने बिषयहरुबारे छलफल गरिएको थियो ।
अवधारणापत्र माथि टिप्पणी खोमा तरामु मगर, टिका राना, जितु तरामु मगर, तेजकुमारी थापाले गर्नुभएको थियो । गुणदेव सिंजालीको अध्यक्षता र सञ्चालनमा भएको कार्यक्रममा राजनीतिक, सामाजिक क्षेत्रका बुद्धिजीवी, शैक्षिक व्यक्तित्व, साहित्यकार, सामाजिक अगुवा, जनप्रतिनिधि, श्री धर्मपुर माध्यमिक विद्यालय र श्री भानु आधारभूत विद्यालयका विद्यार्थीहरुको सहभागिता रहेको थियो ।
बिषयगत शृंखला अन्तर्गत आगामी शृंखला भदौ ४ गते हुने यात्राका संयोजक गुणदेव सिंजालीले बताउनुभएको छ ।
