बुटवल । लगातार पेट्रोलियम पदार्थको मुल्यवृद्धि गर्दै आइरहेकाे सरकारले चुनावको भाेलि पल्ट फेरि मुल्यवृद्धि गरेको छ ।
सरकारले डिजेल, पेट्रोल र मट्टीतेलको मुल्य ह्वात्तै पुनः बढाएको छ । वाणिज्य सचिव डा. गणेशप्रसाद पाण्डेय नेतृत्वको आयल निगम सञ्चालक समितिको बैठकले पेट्रोलियम पदार्थमा प्रतिलिटर १० रुपैयाँ मूल्य बढाउने निर्णय गरेको हो ।
बढेको मुल्यवृद्धि अनुसार अब पेट्रोलको खुद्रा मूल्य प्रतिलिटर १७० रुपैयाँ पुगेको छ भने डिजेल र मट्टीतेलको मूल्य १५३ रुपैयाँ प्रतिलिटर कायम भएको छ ।
निगम सञ्चालक समितिको बैठकले शनिबार रातिदेखि लागु हुनेगरी मूल्य बढाउने निर्णय गरेको नेपाल आयल निगमका प्रवक्ता विनितमणी उपाध्यायले बताए । स्थानीय तहको निर्वाचनलगत्तै सरकारले पेट्रोलियम पदार्थको मूल्यमा भारी वृद्धि गरेको हो ।
यसैबीच पेट्रोलियम पदार्थमा बढाएको मुल्यवृद्धि नेपाल कम्युनिस्ट पार्टी निकट अखिल (क्रान्तिकारी) ले तत्काल खारेज गर्न जाेडदार माग गरेको छ ।
पेट्रोलियम पदार्थको मुल्यवृद्धि विरुद्ध नेकपा निकट अखिल (क्रान्तिकारी) का अध्यक्ष प्रकाश शाहीले आज ५८ औँ विद्यार्थी दिवसको शुभकामना र पेट्रोलियम पदार्थको मुल्यवृद्धि विरुद्ध वक्तव्य जारी गर्दै मुल्यवृद्धि खारेज गर्न माग जाेडदार आग्रह गरेका छन् । आफ्नाे आग्रहलाई बेवास्ता गरिए देशव्यापी कडा संघर्षमा उत्रिन बाध्य हुने संगठनले चेतावनी दिएको छ ।
