मकवानपुर । अखिल (क्रान्तिकारी) मकवानपुर जिल्ला समितिको छात्रा विभागबाट केन्द्रिय कार्यक्रम अनुसार  विभिन्न मागसहित आज जिल्ला प्रशासन कार्यालय मकवानपुरमा  ज्ञापनपत्र बुझाएको छ । 

अखिल क्रान्तिकारी मकवानपुरका सचिव तथा छात्रा विभाग प्रमुख कमरेड शर्मिला थोकरद्धारा हस्ताक्षरित   उक्त ज्ञापन पत्रमा  भनिएको छ, “पछिल्लो समय देशभर शिक्षालयहरूमा छात्राहरू विभिन्न खाले हिंसाका शिकार भइरहेका छन् ।

त्यसमध्ये  यौनहिंसा प्रमूख रहेको छ । छात्राहरू शिक्षालयमा नै असुरक्षित भइरहेका छन् । मोरङको लेटाङ नगरपालिका, चितवनको माडी  नगरपालिका,  सल्यान जिल्ला लगायत देशभर छात्राहरूमाथि भइरहेको यौनहिंसाविरुद्धमा सरकारले चालेको अपर्याप्त र सुस्त कदमप्रति हाम्रो सङ्गठनको गम्भीर ध्यानाकर्षण भएको छ ।

नेपालमा यससम्बन्धी कडा कानुन नहुनु र भएको कानुन पनि सहि तरिकाले कार्यान्वयन नहुनु प्रमूख समस्या रहेको छ । अपराधीलाई कानुनी दायरामा ल्याउनुको सट्टा उल्टै अपराधीलाई नै उन्मुक्ति दिने प्रवृत्ति बढिरहेको छ । पिडितलाई न्यायको प्रत्याभूति हुन सकिरहेको छैन ।

हाम्रो सङ्गठन देभरभर भइरहेका छात्रामाथि यौनहिंसाको  घटनाहरूको सत्यतथ्य पत्ता लगाइ  मुलुकी अपराध संहिता (२०७४ को भाग(२, परिच्छेद (१८ को धारा (२१९,२२०,२२१,२२२,२२३,२२४ र २२५ मा व्यवस्था भएबमोजिम दोषीलाई कारवाही गर्न र छात्राहरूलाई शिक्षालयहरूमा सुरक्षित र हिंसारहित वातावरणमा अध्ययन गर्न पाउने अधिकारको सुनिश्चितता गर्न  जोडदार मागसहित यो  ज्ञापनपत्र पेश गर्दछ ।”