बुटवल । नेकपासहित आठ दलद्धारा एमसीसी सम्झौताका विरुद्ध संघर्षको कार्यक्रम सार्वजनिक गरेका छन् । बुधबार प्रज्ञा भवनमा पत्रकार सम्मेलनमार्फत संयुक्त विज्ञप्ति जारी गरी ती दलले विरोधका कार्यक्रमहरु सार्वजनिक गरेका हुन् ।
विरोधका कार्यक्रमहरु सार्वजनिक गर्ने दलहरुमा विप्लव नेतृत्वको नेकपा, नेकपा मसाल, नेकपा (क्रान्तिकारी माओवादी), राष्ट्रिय जनमोर्चा, देशभक्त गणतान्त्रिक मोर्चा, ऋषि कट्टेल नेतृत्वको नेकपा, वैज्ञानिक समाजवादी कम्युनिष्ट पार्टी, नेपाल र नेकपा माओवादी केन्द्र समाजवादी रहेका छन् ।
पत्रकार सम्मेलनमा बोल्दै नेकपा प्रवक्ता प्रकाण्डले अमेरिकाले नेपालको सार्वभौमिकसत्तामाथि प्रत्यक्ष हस्तक्षेप गरेको भन्दै यो नेपाली स्वाधीनतामाथि खतरा रहेको बताउनुभयो । एमसीसी विकास परियोजनाको नाममा हिन्द प्रशान्त रणनीति जोडिएर आएको बताउदै विगतको राष्ट्रघातको शृङ्खला भएकोले यसको खारेजीका लागी संघर्षको विकल्प नभएको बताउनुभयो । पत्रकार सम्मेलनमा ८ दलका नेताहरुले समेत सम्बोधन गर्नुभएको थियो ।
पत्रकार सम्मेलनमा विरोधका कार्यक्रमहरुमा फागुन २० गते काठमाडौं उपत्यकामा विरोध प्रदर्शन र संयुक्त विरोधसभा गर्ने, फागुन २२ गते बुद्धिजीवीहरुसँग अन्तरक्रिया, फागुन २४ गते विरोध प्रदर्शन र सभा, फागुन २६ गते विद्यार्थीहरूद्वारा क्याम्पस र विद्यालयमा विरोध प्रदर्शन र सभा, फागुन २८ गते युवकहरूको विरोध प्रदर्शन र सभा रहेका छन् ।
त्यस्तै फागुन ३० गते मजदुरहरुको विरोध प्रदर्शन र सभा चैत २ गते किसानहरुको विरोध प्रदर्शन र सभा, चैत ४ गते श्रमिक र दलित समुदायको विरोध प्रदर्शन र सभा, चैत ६ गते मोर्चाहरुले विरोध प्रदर्शन र सभाको आयोजना गर्ने जनाइएको छ ।
