बुटवल । नेकपा रुपन्देहीद्धारा सहिद तथा बेपत्ता परिवारजनलाई भेटघाट गरेको छ । सहिद सप्ताहको सन्दर्भमा नेकपा रुपन्देहीले भेटघाट गरेको हो ।
नेकपा केन्द्रीय सदस्य एवं रुपन्देही इन्चार्ज कृतिले जनयुद्धका सहिद नवराज सिमखडाकी परिवार जया पौडेल र सहिद परिवार महेन्द्र भुसाललाई भेटघाट गर्नुभएको हो । जया पौडेल सहिद नवराज सिमखडाकी श्रीमति र जनक्रान्तिका महान सहिद परिवार संगठन नेपालकी केन्द्रीय सचिव समेत हुनुहुन्छ ।
जिल्ला सेक्रेटरी विश्वासले शुद्धोधन गाउँपालिकास्थित सहिद रामसुबाक चौधरीका परिवार, नाथु थारुका परिवार कमला थारु, चिनक यादवको परिवार, रमेश यादवका परिवारलगायतलाई भेटघाट गर्नुभएको छ ।
अखिल नेपाल जनसांस्कृतिक महासंघ रुपन्देहीले कलाकार चुनु गुरुङको परिवारलाई भेटघाट गरेको छ । पाल्पा दोभानस्थित गुरुङको घरमा गएर महासंघले परिवारलाई भेटघाट गरेको हो । भेटघाटमा महासंघ रुपन्देही अध्यक्ष विहानी मगर र अखिल (क्रान्तिकारी) केन्द्रीय कोषाध्यक्ष रुपा बुढा मगरलगायतको टिम रहेको थियो ।
त्यसैगरी रुपन्देहीमा जिल्लामा रहेका करिब ६० भन्दा सहिद एवं बेपत्ता परिवारलाई नेकपाले भेटघाट गरेको जिल्ला कार्यालयले बताएको छ ।
नेकपा जिल्ला कार्यालयका अनुसार फागुन १६ गते तिलोत्तमास्थित बनबाटिकामा रहेको सहिद पार्कको सभाहलमा सहिद बेपत्ता परिवारजनको भेला गरी विशेष कार्यक्रम गर्न लागेको बताइएको छ ।
रुपन्देहीमा नेकपाले हरेक बर्ष सहिद एवं बेपत्ता परिवारजनलाई सम्मान एवं भेटघाट गर्दै आएको छ ।
