मुलुकभर सहकारीहरुमा बचत कर्ताहरुको रकम फिर्ता हुने सुनिश्चित नभइरहेको बेला फेरि बुटवलमा अर्को सहकारी काण्ड बाहिर आएको छ ।
चैत ३१ गतेको मितिमा बुटवल ११मा रहेको सनराइज बहुउद्देश्यीय सहकारी संस्था लिमिटेडको कार्यालयमा एक सुचना टासी कार्यालय बन्द गरिएको जानकारी गराइएको थियोे ।
उक्त पत्रमा आर्थिक अपचलन गरि संस्थाका अध्यक्ष आकाश भट्टराई तीन महिना देखि सम्पर्क विहिन भएको र खोजी गर्न अनुरोध समेत गरिएको थियोे । चैत ३१ सम्म बचत कर्ताहरुको घर घरमा पुगेको कर्मचारीहरुले बचत संकलन गरिरहेका थिए । सोही दिन पत्र टासिंएको भेटिए पछि घटना थप रहस्यमय भएको छ ।
उक्त सहकारी प्रदेशमा तीन बर्ष अघिमात्र दर्ता भएको भेटिएको छ ।
संचालक तथा अध्यक्ष फरार रहेको हल्ला फैलिएपछि कार्यालय परिसरमा बचत कर्ताहरुको भिडभाड लागेको थियोे । उक्त संस्थामा कति रकमको हिनामिना भयो भन्ने कुराको आधिकारिक जानकारी त प्राप्त भएको छैन तर बजारमा बचत कर्ताको संख्या हेर्दा करोडौं रुपैयाँ अपचलन गरि अध्यक्ष तथा कोषाध्यक्ष फरार रहेको अनुमान गरिएको छ ।
