‘लगानी लुम्बिनीमा , समृद्धि देशमा’ भन्ने मुल नारा सहित बुटवल उद्योग वाणिज्य संघ रुपन्देहीले यहीँ पौष ३ गतेदेखि बुटवलमा आयोजना गरेको औद्योगिक व्यापार मेला २०८१ बिहिबार सम्पन्न भएको छ ।
पौष ३ गतेदेखि १८ गतेसम्म १६ दिन सञ्चालन गरिएको औद्योगिक व्यापार मेलामा ४ लाख भन्दा बढी दर्शकले अवलोकन गरेको र मेला भित्रका स्टलमा सरदर २५ करोड रुपैंया र बाहिर १५ करोड गरि अनुमानित ४० करोड बराबरको आर्थिक कारोवार भएको बुटवल उद्योग वाणिज्य संघ रुपन्देहीका अध्यक्ष तथा मेला कार्यसम्पादन समितिका संयोजक हरिप्रसाद अर्यालले जानकारी गराए । मिडिया क्षेत्र लगाएत सबै तिरबाट राम्रो साथ र सहयोग प्राप्त भएकोमा धन्यवाद व्यक्त गर्दै अध्यक्ष अर्यालले मेलाको सम्पुर्ण हिसाबकिताब छिट्टै सार्वजनिक गर्ने बताए । मेलामा २२ हजार विद्यार्थी तथा ५२ सय जेष्ठ नागरिकहरु सहभागी भएको , २२० जना किसानहरुले माटो परिक्षण गराएको अध्यक्ष अर्यालले बताए ।
मेलाको समापन कार्यक्रममा प्रमुख अतिथिको रुपमा सम्बोधन गर्दै पूर्वगृहमन्त्री तथा नेपाली काँग्रेसका नेता बालकृष्ण खाँणले मुलुकको विकासको लागि औद्योगिक विकास र पलायन भईरहेको युवा जनशक्तिलाई स्वदेशमै रोक्ने गरी कार्यक्रम ल्याउन सरकारलाई आग्रह गरे । उनले युवा जनशक्तिको पलायनसंगै सीप र दक्षता पनि पलायन भईरहेको बताउँदै युवा जनशक्तिलाई रोक्न सकिएन भने देश पछाडी पर्ने भएकाले विदेशमा जस्तै काम गर्दै पढ्दै गर्ने वातावरण निर्माण गर्नुपर्नेमा जोड दिए । बुटवल नारायणगढ सडक खण्डले सबैलाई सास्ती पुराएको बताउदै ठुला परियोजना नेपाली ठेकेदारलाई नै दिनुपर्ने बिचार व्यक्त गरे । गौतम बुद्ध अन्तरास्ट्रिय विमानस्थल नियमितरूपमा संचालन गर्नुपर्नेमा जोड दिदै समग्र रुपन्देहीको विकासको लागि सबै राजनीतिक दलहरूलाई एकजुट हुन आग्रह गरे ।
उक्त समापन कार्यक्रमलाई सम्बोधन गर्दै बुटवल उपमहानगरपालिका प्रमुख खेलराज पाण्डेले बुटवलको औद्योगिक व्यापार मेला ऐतिहासिक मेला भएको बताए । यस्ता मेलाहरु बुटवलमा संचालन गरिरहनुपर्नेमा जोड दिदै बुटवल उपमहानगरपालिकाले विकास निर्माण तथा सामाजिक कामहरुलाई तीव्रता दिएको बताए ।
बुटवलबाट राजधानी राखिएकोमा तीब्र असन्तुष्टि जनाउदै नगर प्रमुख पाण्डेले सबै मिलेर समृद्ध बुटवल बनाउन लाग्नुपर्नेमा जोड दिए ।
