यस वर्षका लागि भौतिकशास्त्रतर्फको नोबेल पुरस्कार आर्टिफिसियल इन्टेलिजेन्ससम्बन्धी अनुसन्धानका लागि दुईजना वैज्ञानिकलाई संयुक्त रुपमा दिने घोषणा नोबेल कमिटीले गरेको छ।
अमेरिकी वैज्ञानिक जोन जे हक्फिल्ड र ब्रिटिस क्यानडेली वैज्ञानिक जफ्री इ हिल्टनलाई ‘आर्टिफिसल न्युरल नेटवर्क मार्फत् मसिन लर्निङलाई सक्षम बनाउनेतर्फ आधारभूत खोज तथा आबिस्कार गरेकोमा’ उक्त पुरस्कार दिने निर्णय गरिएको नोबेल कमिटीले जानकारी दिएको छ।
यसअघि सोमबार ‘माइक्रो आरएनए’को अनुसन्धानबापत वैज्ञानिकहरु भिक्टर एम्ब्रोस र ग्यारी रुवकुनलाई यस वर्षको चिकित्साशास्त्रको नोबेल पुरस्कार प्रदान गर्ने घोषणा नाेबेल कमिटीले गरेको थियो। शरीर विज्ञान र चिकित्सा विज्ञानसम्बन्धी नोबेल कमिटीका उपाध्यक्ष ओल्ले क्याम्पेका अनुसार माइक्रोआरएनएको यस अनुसन्धानले जिन रेगुलेसनका लागि नयाँ र अनपेक्षित संयन्त्रलाई पत्ता लगाएको छ।
७ देखि १४ अक्टोबर सम्म विज्ञान, अर्थशास्त्र, साहित्य तथा शान्ति जस्तो उत्कृष्ट क्षेत्रमा काम गर्नेहरुलाई नोबेल पुरस्कारले सम्मान गर्ने गरिएको छ। यो पुरस्कार स्विडेनको स्टकहोममा दिने गरिन्छ।
नोबेल पुरस्कारबापत ११ मिलियन स्विडिस क्रोनर प्राप्त हुन्छ।
