बुटवल । वरिष्ठ पत्रकार कर्णबहादुर कार्कीको स्मृतिमा श्रद्धाञ्जली कार्यक्रम सम्पन्न भएको छ ।
श्रद्धाञ्जली कार्यक्रममा बोल्दै राष्ट्रिय जनमोर्चाका अध्यक्ष एवं सांसद चित्रबहादुर केसीले दिवंगत कर्णबहादुर कार्की लोकतन्त्र र गणतन्त्रप्रति प्रतिबद्ध योद्वा भएको बताउदै उनले राजनीतिक बेइमानी विरूद्व संघर्ष गरेको बताए । उनले पत्रकार कार्कीहरूले कलम चलाएर लोकतन्त्र र गणतन्त्र प्राप्त भएको बताउँदै कार्यक्रममा संसदमा नै भएका पार्टीहरूबाट लोकतन्त्र र गणतन्त्र खतरामा रहेकोे बताए ।
नेकपा पोलिटब्युरो सदस्य वसन्त सीले पत्रकार कार्कीले जनयुद्धको समयमा महत्त्वपूर्ण योगदान गर्नुभएको बताउँदै राज्यको दमनको विरूद्व कार्की सशक्त रूपमा उभिएको बताए। उनलेे कार्की निर्भिक, स्वाभिमानी र साहसी पत्रकार बताए ।
क्रान्तिकारी कम्युनिस्ट पार्टीका नेता कृष्ण पौडेलले कार्कीसित २०४२ सालदेखि सहकार्य गरेको भन्दै कार्की असाध्यै सरल भएको र सुकुम्बासी आन्दोलनको नायक भएको बताए ।
वामपन्थी नेता बिनबहादुर कुँवरले कार्कीले ०४७ को आन्दोलनमा कार्कीले महत्त्वपूर्ण भूमिका खेलेको बताउदै कार्कीले सुकुम्बासी आन्दोलनमा महत्त्वपूर्ण योगदान गरेको बताए ।
पत्रकार मोहन चापागाईंले कार्की ज्युँदो मान्छे भएको बताउदै उनको पारिवारिक, पत्रकारिता, राजनीतिक र ब्यवसायिक ब्यक्तित्व भएको बताए । उनले कार्कीको जीवनको मूल उद्वेश्य राजनीति भएको र पत्रकारिता पहिचान भएको बताए ।
कार्यक्रममा लेखक ऋषि आजाद र अधिवक्ताद्व्य पदम कार्की र ज्ञानु केसीले समेत श्रद्धाञ्जली मन्तव्य दिएका थिए । लुम्बिनी दैनिक र राष्ट्रिय स्वाधीनताका लागि नागरिक मन्चको आयोजनामा कार्यक्रम भएको थियो ।
