बुटवल । नेकपा निकट जनवर्गीय संगठनहरुको संयुक्त आयोजनामा बुटवलमा पेट्रोलियम पदार्थमा भएको मूल्यवृद्धिविरुद्ध कोणसभा सम्पन्न गरेको छ ।
कोणसभालाई सम्बोधन गर्दै नेकपा रुपन्देही जिल्ला सदस्य एनबी शाहीले सरकारले पेट्रोलियम पदार्थमा मूल्यबृद्धि गरेर जनताको ढाड सेकेको भन्दै जनविरोधी सरकारविरुद्ध संघर्षको विकल्प नभएको बताए । उनले सरकार दलालहरुको भएको भन्दै मूल्यबृद्धि फिर्ता नगरिए सरकारले ठूलो मूल्य चुकाउनुपर्ने बताए ।
अखिल नेपाल लेखक संघका महासचिव खोमा तरामु मगर र जनक्रान्तिका महान सहिद परिवार संगठन नेपालका केन्द्रीय सचिव जया पौडेलले सरकार माफियाहरुले चलाएको भन्दै आयल निगम भ्रष्टचारीहरुको अखडा भएको बताए । उनीहरुले पेट्रोलियम पदार्थमा गरिएको मूल्यवृद्धि अबिलम्ब फिर्ता गर्नुपर्ने भन्दै नत्र संघर्षलाई तीब्रता दिइने बताए ।
नेकपाले मूल्यबृद्धि विरुद्ध देशव्यापी संघर्ष अन्तर्गत रुपन्देहीमा जबस मोर्चाले संयुक्त विरोध कोणसभा गरेको हो । आयल निगमले इन्धनमा सोमबार राती १२ बजे रातीदेखि लागुहुने गरी पेट्रोल र डिजेलमा ३ को दरले मूल्यवृद्धि गरेको थियो ।
